Видеоэкспонаты
  • Выставка «Пространство памяти моей души», посвященной 105-летию Галины Кривошапко

  • Виртуальная выставка «Наталья Семёновна Посельская – педагог от Бога»

  • Виртуальная выставка “Генрих Ильич Литинский — эпоха якутской музыки”, посвященную к 120-летию


  • Саха литературатын уруогар информационнай-коммуникативнай технологиялары туһаныы
    1 ноября 2019

    Алтынньы 31 күнүгэр Саха сирин норуоттарын музыкатын уонна фольклорун музейыгар «Саха литературатын уруогар информационнай-коммуникативнай технологиялары туһаныы (Өксөкүлээх Өлөксөй олоҕун, айар үлэтин сырдатар видеоуруогун холобуругар) диэн маастар-кылаас ыытылынна. Маастар-кылааһы ыытта филология магистра, Саха сирин норуоттарын музыкатын уонна фольклорун музейын директорын солбуйааччытын эбээһинэһин толорооччута, видеоуруок ааптара Ноговицын Александр Павлович.

                Саха литературатын төрүттээччи, төрөөбүт тылын, норуот историятын уонна культуратын чинчийээччи, норуот фольклорун утумнаах хомуйааччыта уонна үөрэтээччитэ, сырдатааччы, наука араас салааларыгар маҥнайгы суолу тэлээччи, сахалартан биир бастакы учуутал, киэҥ, дириҥ көрүүлээх гуманист-философ Алексей Елисеевич Кулаковскай-Өксөкүлээх Өлөксөй олоҕун, айар үлэтин сырдатар видеоуруок Саха сирин норуоттарын музыкатын уонна фольклорун музейа уонна А.Е. Кулаковскай института кыттыгас проектара методическай матырыйаал буолан бу сайын күн сирин көрбүтэ.

    Маастар-кылаас саха тылын, литературатын учууталларыгар, устудьуоннарыгар, магистраннарыгар информационнай-коммуникативнай технологиялары саха литературатын уруогар хайдах табыгастаахтык туһанан үөрэтии ньымаларын ырытыһыы уонна опыт атастаһыы быһыытынан ыытылынна.

                Александр Ноговицын киирии тылыгар бу видеоуруок оҥоһуллубут историятын, ис тутулун, сыалын-соругун, уруокка учуутал хайдах туһаныан сөбүн кэпсээтэ. Видеоуруогу көрүү кэнниттэн, ырытыһыы, санаа атастаһыыта, туох өссө эбии оҥоһуллуон сөбүн, кэрэхсэнэр өрүттэрин этии, инникитин өссө хайдах кэҥэтэн оҥоруохха сөбүн, билиҥҥи үөрэнээччи ордук туох интэриэстээҕин, учууталга туох көмөлөөҕүн туһунан олус истиҥ кэпсэтии таҕыста.

               

                Попова Мария Матвеевна, Дьокуускай куорат 17 №-дээх оскуолатын саха тылын уонна литературатын учуутала:

    «Олус боччумнаах уонна наадалаах видеоуруок оҥоһуллубут, биһиги саха тылын, литературатын учууталларыгар маннык хабааннаах методическай матырыйаал суоҕун кэриэтэ, онон хас биирдии учуутал бу уруоктан бэйэтэ толкуйдаан хайдах матырыйаалы үөрэнээччилэрин таһымнарыттан көрөн туһаныан сөп эбит. Биһиги оскуолабытыгар сылын ахсын «Кулаковскай ааҕыылара» диэн конференция тэрийэн ыытабыт, онно бу видеоуруок наһаа туһалаах буолсу. Уонна бу видеоруокка биһигини үөрэппит учууталларбыт, саха норуотугар биллэр учуонайдар кыттыыны ылбыттарын көрөн олус диэн үөрдүм. Саҥа көлүөнэ учуонайдар атыннык көрөн чинчийиэхтэрэ, ону тэҥэ үөрэнээччилэр эмиэ таһымнара, өйдөрө-санаалара уларыйан иһиэҕэ, онон аҕыйах сылынан Кулаковскайга анаммыт видеоуруок сыаннаһа үрдээн иһиэ диэн этэбин».

     

                Никитина Нюргуяна Гаврильевна, педагогическай наука кандидата, саха тылын, литературатын уонна төрүт култууратын методикатын кафедратын доцена:

    «Видеоруок үчүгэйдик толкуйдаммыт, системаламмыт, биир чаас иһигэр Өксөкүлээх Өлөксөй олоҕун, айар үлэтин туһунан толору информацияны биэрэр методическай матырыйаал буолан тахсыбыт. Олус элбэҕи биллим, көрдүм, иһиттим уонна маннык санааҕа кэллим, бу видеоуруок ордук учууталга уонна устудьуоҥҥа туһаайыллыбыт диэн, Александр Павлович Өксөкүлээх нэһилиэстибэтин чинчийэ сылдьар киһи быһыытынан ордук научнай өттүттэн көрүүтэ баһыйбыт. Онон бу видеоуруогу университекка лекцияларбытыгар, научнай үлэни суруйууга туһаныахпытын сөп эбит».

     

    Захарова Галина Алексеевна, педагогическай наука кандидата, саха тылын, литературатын уонна төрүт култууратын методикатын кафедратын доцена:

    «Билигин «цифрозизация образования» диэҥҥэ көһүү киирэн эрэр, методистартан, учууталлартан ирдээн эрэллэр, онно сөп түбэһэр бу видеоуруок оҥоһуллан тахсыбыта олус үчүгэй. Учууталга олус көмөлөөх видеоуруок, хайдах баҕарар толкуйдаан уруокка туһаныан сөп. Элбэх информационнай матырыйааллаах, билиҥҥи үөрэх ирдэбилигэр эппиэттиир видеоуруок оҥоһуллан тахсыбыт».     

     

    Жиркова Мария Семеновна, Уолан гимназия саха тылын, литератураьын учуутала (Уус-Алдан), ХИФУ магистрана:

    «Өксөкүлээх Өлөксөй олоҕун, айар үлэтин сырдатар видеоуруок биһиэхэ учууталларга олус көмөлөөх методическай матырыйаал оҥоһуллан тахсыбыт. Бу видеоруруогу көрөн баран, уруокка учуутал хайдах баҕар толкуйдаан туһаныан сөп эбит диэн санааҕа кэллим уонна уруок таһынан эбии дьарыкка туттуохха сөп. Бу курдук хабааннаах уруоктар билиҥҥи үөрэнээччилэргэ олус көдьүүстээх, оҕо көрөн-истэн, атын дьон кэпсиирин быдан үчүгэйдик ылынар. Бу видеоуруокка артыыстар хоһоону ааҕыылара, видеосюжет, презентационнай матырыйаал, Кулаковскайы  чинчийэ сылдьар учуонайдар кэпсииллэрэ, ааптар научнай ыстатыйалара киирбиттэрэ кэрэхсэтэр».

     

    Кириллина Милена Михайловна, Хотугулуу-Илиҥҥи норуоттар тылларын уонна култуураларын институтун устудьуона:

    «Видеоуруогу көрөн баран олус диэн сөбүлээтим, биир чаас иһигэр Өксөкүлээх Өлөксөй олоҕун, айар үлэтин туһунан олус элбэх матырыйаал киирбит, элбэҕи биллим-көрдүм. Биир уруокка эрэ буолбакка кылаас таһынан дьарыкка туһаныахха сөп эбит, мин санаабар ордук Кулаковскайга научнай үлэни суруйалларыгар олус туһалаах буолсу. Инникитин классик суруйааччыларга барыларыгар серия курдук маннык видеоуруоктары таһаараргыт буоллар диэн баҕа санаалаахпын».

     

     



    Author of the theme: Tonyc - freelance.ru/users/tonyc