Видеоэкспонаты
  • Выставка «Пространство памяти моей души», посвященной 105-летию Галины Кривошапко

  • Виртуальная выставка «Наталья Семёновна Посельская – педагог от Бога»

  • Виртуальная выставка “Генрих Ильич Литинский — эпоха якутской музыки”, посвященную к 120-летию


  • Олоҥхо ыһыаҕар «ЫЛЛЫЫР ПРОКОПИЙ ЯДРИХИНСКАЙ-БЭДЬЭЭЛЭ» диск сүрэхтэннэ
    28 июня 2019

    Быйылгы Олоҥхо ыһыаҕар Саха сирин норуоттарын музыкатын уонна фольклорун музейа бэйэтин фондатыттан норуот ырыаһыта, тойуксут, олоҥхоһут Прокопий Прокопьевич Ядрихинскай-Бэдьээлэ дискэтин сүрэхтээтэ.

    П.П. Ядрихинскай- Бэдьээлэ, Саха АССР культуратын үтүөлээх үлэһитэ, СССР суруйааччыларын союһун чилиэнэ, тойуксут уонна олоҥхоһут. Бэйэтин кэмигэр бастыҥ чулуу үлэһит, инники күөҥҥэ сылдьар стахановец этэ, төрөөбүт-үөскээбит Көбөкөнүн нэһилиэгэр колхуос төрүттэнэригэр төһүү күүс буолбута. Колхуос, сопхуос үлэтин бэтэрээнэ. Норуот тылын уус-уран айымньыта үйэтийэригэр кылаатын киллэрбит Нам улууттан П.П. Ядрихинскай-Бэдьээлэ аата фольклор эйгэтигэр дьоһун миэстэни ылар. Кини тута хоһуйааччы быһыытынан ыллаан-туойан хаалларбыт “Тараҕана сайылык” айымньыта саха литературатын хрестоматиятыгар бигэтик киирэн хас да көлүөнэ саха ыччатын өйүгэр хатаммыта, уус-уран тыл дэгэттээх умсулҕаныгар уһуйбута. Маны сэргэ, “Ходуһа уһуктуута” (1964), “Олоххо айхал” (1971) уо.д.а тойуктара бэчээккэ тахсыбыттара.

    Прокопий Ядрихинскай олоҥхоһут быһыытынан “Дьырыбына Дьырылыатта Кыыс бухатыыр” уонна “Күн Дьөһүөлдьүн” айымньыларын суруттаран хаалларбыта радио фондатыгар харалла сытар. Кини тыыннаах куолаһыттан суруллубут олоҥхотун фольклорист Петр Никифорович Дмитриев анаан устан, кэлин “Дьырыбына Дьырылыатта Кыыс бухатыырын” (1981)  бэчээккэ бэлэмнээн таһааттарбыта.

    Кэлин Прокопий Ядрихинскай- Бэдьээлэ “Дьырыбына Дьырылыатта Кыыс бухатыыр”олоҥхото сахалыы-нууччалыы тылынан филологическай наука кандидата Тамара Ивановна Петрова салалтатынан М.К. Аммосов аатынан ХИФУ тылбаас салаатын устудьуоннара кыттыгастаах академическай таһымнаах кинигэ буолан тахсыбыта (2010). Быйылгы Намҥа ыытыллар Олоҥхо Ыһыаҕар”  бу олоҥхо эбии научнай өттүнэн чочуллан Олоҥхо институтун бэлэмнээһининэн күн сирин көрдө (2019).

    “Ыллыыр Прокопий Ядрихинскай-Бэдьээлэ” диэн ааттаах аудио-диск тойуксут, олоҥхоһут Саха сирин норуоттарын музыкатын уонна фольклорун түмэлин фондатыттан (ММФНЯ НВ-160) оцифровкаланан бэчээттэннэ. Оцифровканы М.Н. Жирков аат. ДьМК (У) сүрүн инженера Курганов Олег Васильевич онтон техническай үлэтин Саха сирин норуоттарын музыкатын уонна фольклорун түмэлин сүрүн оператора Яковлев Иван Афанасьевич оҥордо.

    Бу аудио-диискэҕэ норуот тапталлаах ырыаһытын П.П. Ядрихинскай-Бэдьээлэ репертуарыттан: “Тараҕана сайылык”, “Ньургун трактор”, “Торбосчут Домна” уус-уран ааҕыы, олоҥхо ырыалара: “Абааһы уолун ырыата”, “Бухатыыр ырыата”, “Сорук Боллур ырыата”, “Ытык Хаскыйдаан ырыата” уонна оһуокай  киирдилэр. Аудио-диискэ тас өттүгэр Намтан төрүттээх худуоһунньук Э.С. Сивцев линогравюрата туһанылынна.



    Author of the theme: Tonyc - freelance.ru/users/tonyc